كاس إفريقي للترياتلون Coupe d'Afrique de Triathlon, récit de Asma Radhouane

#كاس_إفريقيا_للترياتلون : أوّل ترياتلون ليّا و ثاني تضاهرة نشارك فيها من بعد الحرب الطويلة و الدّامية مع إصابتي.

لحقيقة خلطت على التحضيرات خلوط، على خاتر مع ساقي اللي كل نهار و علمها ماكنتش متأكده من مشاركتي، لكن من بعد توكلت على ربّي و صار الترياتلون هو الحدث اللي نقوم و نصبح عليه : تمرينات مشددة و ماكلة صحيّة و برشا عزيمة بش نخلط عاللي فاتني الكل، وصلت نترانا مرّتين في النهار و ناكل بالميزان و نسيت خرجات الjunk food مع الاصحاب و بالطبيعة مركّزة على معالجة ساقي وحدي بالمسّاجات و الثلج..

  و أخيرا كنت حاضرة و في فورمة على خط الإنطلاق نهارت 5 ماي و كنت مفعمة بالحماس و السّتراس كيما أغلب المتشاركين.

بدينا بالبحر اللي كان نقطة ضعفي، أوّل ما هبطت في الماء تفجعت و دخلت بعضي، بالرغم من انّي من عشّاق البحر، لكن موش كيما في المسبح اللي يبدى مقسّم و مسطّر وكل شيء مستوي. هوني الدنيا مسيّبة و كثرة العباد تخوّف تقول قبيلة هابطة تحارب و الطريقة الوحيدة بش تعرف الثنية هي إنّك تهزّ راسك الدايخ و تتفقّد الإشارة كل مرّة ولاّ تسمع أختك تصيح عليك و تقلّك "يا أسماء موش من غااادي راك غالطة!" بعد ما فتت الاشارة الاولى بديت نسيطر على التركيز متاعي و رجعت نعوم كيما مستانسة و خرجت مالبحر مفرشكة و متحمّسة للاختبار الجاي.

أوّل غلطة عملتها كانت في مرحلة الانتقال وقتلي لقيت روحي جايبة دبش زايدين ضيعولي وقتي و انا نلبس فيهم و اختي اللي كانت ورايا خلطت عليا و لبست فيسع و طارت طيران بالبسكلات. لكن موش مشكل، تو في الدّار نتفاهم مع روحي، تو موش وقتو.. لبست حوايجي و طلعت على بسكلاتي و كانت الأمور تحت السيطرة و السرعة متاعي محترمة و الأصدقاء محلاهم يشجّعو فيّا في كل دورة، الشيء اللي يفرّحني و يزيدني دافع بش نكمّل  إلى أن حصل ما لم يكن في الحسبان و نلقى روحي فايتة ال20 كلم و كي جيت بش نرجع في الثنية قالّي الحكم اللي يلزمني نكمّل الدورة متاعي. أكيد راهي اللgarmin متاعي تضحك عليا وقتها خاترني ما غزرتلهاش جملة.

للأسف ضيّعت برشا وقت و تنرفزت على روحي و ما فهمتش كيفاش قد ما عظّيت صوابعي في كل دورة هي هي و غلطت في الحساب.. و بديت نفشل و نرخّ بعد العملة متاعي لكنّي و الحمد لله قعدت مسيطرة على ما تبقّى من التركيز و انتقلت لإختبار الجري بسرعة مشرّفة و  غلبت كل الأصوات داخلي اللي قالولي "زايد راهو اللي تعمل فيه" 

وصلت أخيرا لخط النهاية، كمّلت أوّل ترياتلون ليّا بالرغم من العثرات. لصحاب لكل يشجّعو و فرحانين، مانّجم كان نضحكلهم و نسلّم عليهم لكن دوبا ما خذيت الميداليّة أعصابي ترخفت و تسيّبت في البكاء... تعدّالي فلاش باك متع فترة طوية و خايبة عدّيتها و أنا نعاني بساقي, وقتلي لعباد لكل يجريو في مختلف التضاهرات الرياضيّة و عاملين جو، أنا وقتها أقصى طموحي إنّي نمشي للخدمة من غير وجايع و بالرغم من هذا لكل كنت ما نفلّت حتى تضاهرة، نمشي مع اصحابي و نشجّعهك و نفرحلهم و ننصح باللي انّجم.. هذا لكل و انا نكوع بساقي وحسرتي كبيرة و قلبي من داخل يعلم بيه كان ربي.

بفضل ربي ليوم تحسّنت صحّتي و غلبت الإصابة اللي عجّزت طبّة تونس لكل. الابتلاء متاعي كانلي سبب بش نتعمّق في الابحاث و نتعلّم حاجات جديدة  نكتسب خبرة في مجال الرياضة و الإصابات و بالرغم من العثرات و المطبّات و إلتحاقي في اخر لحضة على التحضيرات، تحصّلت و بكل شرف على الميداليّة البرونزيّة في كاس افريقيا للترياتلون. 

نهدي الإنتصار هذا لزوز وخياني نعزّهم برشا و نتمنالهم الشفاء العاجل أحمد الفاهم مجدوب و زياد الباهي و نشكر اصحابي اللي جاو يشجّعو و كل من أمّن بيّا و كل من ساهم من قريب أو من بعيد على إنّي نفكّ بلاصتي ليوم عالبوديوم و نشرّف جمعيّة العدو بتونس و أوّلهم نزار اللي لولاه ماكنّاش نحلمو الحلمة المزيانة هاذي.

صحيح اللي ترياتلون ليوم صغير في حجمو لكن الأبطال متع الرياضة  لكل بداو بتجارب صغيرة و إن شاء الله اللي جاي ديما خير.

#نحّي_الكونيكسيون_من_يديك_وإيجا_إجري_على_ساقيك

#noPainNoGain #NeverGiveUp